O poema preferido de Noelia

Negra sombra

Cando penso que te fuches,

negra sombra que me asombras,

ó pe dos meus cabezales

tornas facéndome mofa.

Cando maxino que es ída,

no mesmo sol te me amostras,

i eres a estrela que brila,

i eres o vento que zoa.

Si cantan, es ti que cantas;

si choran, es ti que choras;

i es o murmurio do río,

i es a noite y es a aurora.

 En todo estás e ti es todo

pra min i en min mesma moras,

nin me abandonarás nunca,

sombra que sempre me asombras.
Rosalía de Castro: Follas Novas.

A min este poema paréceme moi bonito e creo que podería ser o himno de Galicia do bonito que é. Para min é o mellor que escribiu Rosalía.

Noelia Valiño Vidal 1ºD

 Grazas, Noelia, encantounos que compartises este poema connosco. Unha gran elección, pois Negra sombra de Rosalía de Castro é O POEMA máis fermoso que se podía ter escrito. Como agaradecemento pola túa xenerosidade, larpeirandopalabras quere facerche un agasallo. Seguro que che gusta.